अहिल्यानगर: अहिल्यानगर जिल्हा मध्यवर्ती सहकारी बँकेच्या (ADCC Bank) पंचवार्षिक निवडणुकीत उमेदवारी अर्ज दाखल करण्याच्या अंतिम दिवशी एक अत्यंत महत्त्वपूर्ण आणि राजकीयदृष्ट्या मोठी घडामोड घडून आली आहे. महाराष्ट्र विधान परिषदेचे सभापती प्रा. राम शिंदे यांनी या निवडणुकीत प्रत्यक्ष उतरण्यास पूर्णविराम देत उमेदवारी अर्ज दाखल न करण्याचा म्हणजेच माघार घेण्याचा निर्णय घेतला आहे.
गेल्या काही दिवसांपासून प्रा. राम शिंदे कर्जत की जामखेड यांपैकी कोणत्या मतदारसंघातून नशीब आजमावणार, याबाबत जिल्ह्यात कमालीची उत्सुकता ताणली गेली होती. मात्र, सोमवारी त्यांनी स्वतः आपली अधिकृत भूमिका मांडत या सर्व चर्चांना पूर्णविराम दिला.
“घटनात्मक पदाची प्रतिष्ठा सर्वोच्च”; अंतरात्म्याचा आवाज ऐकून निर्णय
निवडणूक न लढवण्यामागचे कारण स्पष्ट करताना प्रा. राम शिंदे यांनी आपल्या सभापती पदाचे औचित्य अधोरेखित केले. ते म्हणाले:
“मी ज्या घटनात्मक पदावर कार्यरत आहे, त्याची मला पूर्ण जाणीव आहे. महाराष्ट्र विधान परिषदेच्या सभापती म्हणून माझ्यावर असलेल्या पदाची प्रतिष्ठा, गौरव आणि निष्पक्षता जपणे ही माझी नैतिक व घटनात्मक जबाबदारी आहे. जिल्ह्यातील सर्व व्यापक परिस्थितीचा शांतपणे विचार केल्यानंतर माझ्या अंतरात्म्याच्या आवाजाने मला या निवडणुकीत अर्ज न दाखल करण्याचा सल्ला दिला. हा निर्णय कोणत्याही राजकीय दबावातून किंवा वैयक्तिक कारणातून घेतलेला नाही, तर राजकीय महत्त्वाकांक्षेपेक्षा घटनात्मक पदाची प्रतिष्ठा सर्वोच्च मानणारा मी निष्ठावंत कार्यकर्ता आहे.”
“अर्ज भरणार नाही, पण निवडणुकीवर पूर्ण लक्ष”: राम शिंदेंचा रोखठोक इशारा
हा निर्णय अंतरात्म्याचा आवाज आणि राजकीय रणनीतीचा एक भाग असल्याचे सांगत प्रा. शिंदे यांनी स्पष्ट केले की, ते प्रत्यक्ष उमेदवार नसले तरी सहकारातील या लढतीपासून दूर राहणार नाहीत.
“मी माझ्या स्वतःच्या निवडणुकीपेक्षा कार्यकर्त्यांच्या आणि पक्षाच्या निवडणुकीत अधिक वेगाने, ताकदीने आणि आक्रमकतेने काम करतो, हे जामखेड नगरपालिकेत सर्वांनी पाहिले आहे. या निवडणुकीमध्येसुद्धा मी प्रत्यक्ष अर्ज दाखल करत नसलो, तरी या संपूर्ण निवडणुकीवर आणि राजकीय घडामोडींवर माझे पूर्ण लक्ष असणार आहे,” असा स्पष्ट संदेश त्यांनी दिला.
अर्जाच्या अंतिम दिवशी राजकीय चित्राला स्पष्टता
प्रा. राम शिंदे यांनी यापूर्वी बँकेसाठी उमेदवारी अर्जाची उचल केली होती. त्यामुळे ते सोमवारी समर्थकांसह अर्ज दाखल करून राजकीय ताकद दाखवतील, असा कयास बांधला जात होता. मात्र, अर्ज दाखल करण्याच्या शेवटच्या दिवशी त्यांनी घेतलेल्या या संयमी व विचारपूर्वक निर्णयामुळे त्यांच्या उमेदवारीबाबतच्या सर्व अटकळींना आता पूर्णविराम मिळाला आहे.
दरम्यान, प्रा. राम शिंदे यांनी स्वतःची उमेदवारी मागे घेतली असली तरी कार्यकर्ते, पक्ष आणि जिल्हा बँकेच्या निवडणुकीतील राजकीय घडामोडींमध्ये सक्रिय राहण्याचा स्पष्ट संदेश दिला आहे. त्यामुळे त्यांचा प्रत्यक्ष उमेदवारीचा अध्याय संपला असला, तरी जिल्हा बँकेच्या निवडणुकीतील त्यांच्या राजकीय भूमिकेकडे लक्ष राहणार आहे.
सोमवारी उमेदवारी अर्जांची मुदत संपल्यानंतर उद्या (दि. ६) अर्जांची छाननी होणार असून बुधवारपासून वैध अर्जांची यादी प्रसिद्ध केली जाईल. २२ ऑक्टोबरपर्यंत अर्ज मागे घेण्याची मुदत आहे. माघारीनंतर निवडणूक बिनविरोध न झालेल्या जागांसाठी २ नोव्हेंबर रोजी प्रत्यक्ष मतदान पार पडणार आहे.
