जामखेड: जामखेड शहरात तुळजाभवानी मातेचा सातव्या माळेला येणारा पलंग दर्शनासाठी दाखल झाल्याने भाविकांची मोठी गर्दी पाहायला मिळत आहे. या गर्दीचा फायदा घेऊन गुन्हेगारी कृत्ये करणाऱ्या चोरट्यांवर वचक ठेवण्यासाठी पोलिसांनी ठिकठिकाणी बंदोबस्त तैनात केला होता. मात्र, यादरम्यान एका चोरट्याला पकडण्याचा प्रयत्न केला असता, त्याने पोलीस कॉन्स्टेबलवरच प्राणघातक हल्ला केल्याची धक्कादायक घटना समोर आली आहे. या हल्ल्यात पोलीस कॉन्स्टेबल गंभीर जखमी झाले आहेत.
नेमकी घटना काय?
जामखेड नगरपरिषदेच्या नवीन इमारतीजवळ गर्दीच्या ठिकाणी पोलीस कॉन्स्टेबल कुलदीप घोळवे यांना एक कथित सराईत चोरटा नागरिकांचे खिसे कापताना निदर्शनास आला. त्यांनी तातडीने सतर्कता दाखवत त्या चोरट्याला पकडण्याचा प्रयत्न केला. परंतु, गर्दीचा फायदा घेत आरोपीने हुशारीने कॉन्स्टेबल घोळवे यांच्याच हातातील पोलिसांकडील काठी हिसकावून त्यांच्या डोक्यात प्रहार केला. या अचानक झालेल्या हल्ल्यात कॉन्स्टेबल कुलदीप घोळवे गंभीर जखमी झाले असून त्यांच्यावर एका खासगी रुग्णालयात उपचार सुरू आहेत.
आरोपी जेरबंद, गुन्हा दाखल करण्याची प्रक्रिया सुरू
घटनेची माहिती मिळताच इतर पोलीस कर्मचाऱ्यांनी तात्काळ तत्परता दाखवत घटनास्थळावर धाव घेतली आणि आरोपीला जेरबंद केले. या प्रकरणी जामखेड पोलीस ठाण्यात गुन्हा दाखल करण्याचे काम सुरू असून आरोपीविरुद्ध कठोर कायदेशीर कारवाई केली जात आहे.
तुळजाभवानी मातेच्या पलंगाच्या दर्शनासाठी शहरात भाविक दाखल होत असून सुरक्षेसाठी मोठा पोलीस बंदोबस्त तैनात करण्यात आला आहे. मात्र, या प्रकारामुळे शहरात एकच खळबळ उडाली आहे. गर्दीच्या ठिकाणी नागरिकांनी आपल्या मौल्यवान वस्तू, मोबाईल आणि पैशांची विशेष काळजी घ्यावी, असे आवाहन प्रशासनाकडून करण्यात आले आहे.
