जामखेड : नान्नज (ता. जामखेड) येथील शिवाजीनगर मदरसा परिसरात घडलेल्या भल्या पहाटेच्या १५ लाखांच्या थरारक दरोडा प्रकरणाला आता अत्यंत नाट्यमय वळण मिळाले आहे. “पोलीस प्रशासनाने सहकार्य केले नाही, तास न तास ताटकळत ठेवले आणि फिर्याद चुकीच्या पद्धतीने नोंदवून आमची फसवणूक केली!” असा गंभीर व थेट आरोप करत दरोडा पीडित गोरे कुटुंबीयांनी ४ महिन्यांच्या चिमुकल्या नातवासह रस्त्यावर ठाण मांडले. शनिवारी (३ ऑक्टोबर) सकाळी जामखेड-करमाळा महामार्गावर तब्बल ३ तास तीव्र रस्ता रोको आंदोलन करण्यात आल्याने वाहतूक पूर्णपणे ठप्प झाली होती.
अखेर कर्जत विभागाचे उपविभागीय पोलीस अधिकारी (DYSP) सुजितकुमार क्षीरसागर यांच्या कडक दखलीनंतर आणि सहाय्यक पोलीस निरीक्षक अजित मोरे यांच्या हस्ते देण्यात आलेल्या लेखी आश्वासनानंतर हे आंदोलन मागे घेण्यात आले.
“सकाळी साडेदहा ते रात्री सात… पोलिसांचा मनस्ताप अन् टाळाटाळ!”
दिनांक २ ऑक्टोबर २०२६ रोजी रात्री उशिरा तहसीलदार जामखेड यांना दिलेल्या निवेदनात फिर्यादी मनिषा श्रीमंत गोरे व गोरे कुटुंबाने पोलीस प्रशासनाच्या कारभारावर गंभीर प्रश्न उपस्थित केले आहेत.
निवेदनातील मुख्य व खळबळजनक मुद्दे:
- तात्काळ ११२ वर कॉल: दरोड्याची घटना घडताच मुलगा अक्षय गोरे याने ‘Dial 112’ वर संपर्क साधून पोलीस प्रशासनाला माहिती दिली होती.
- दिवसभर पोलीस ठाण्यात ताटकळले: फिर्याद देण्यासाठी मुलगा अक्षय सकाळी १०:३० वाजल्यापासून, तर जखमी मनिषा गोरे दुपारी १:३० ते सायंकाळी ७ वाजेपर्यंत जामखेड पोलीस ठाण्यात बसून होत्या.
- अधिकाऱ्यांकडून मानसोपचार व त्रास: पीआय दशरथ चौधरी व अधिकारी वर्षा जाधव यांनी वेगवेगळे प्रश्न विचारून आणि फिर्यादीच्या मुद्द्यांवरून नाहक मानसिक त्रास दिला.
- दुपारी ४ ते ६ – साधी दखलही नाही: तब्बल दोन तास फिर्यादीकडे पोलिसांनी पूर्णपणे दुर्लक्ष केले.
- घाईघाईत चुकीची एफआयआर (FIR): सायंकाळी ६:३० ते ७ या वेळेत पोलीस अंमलदार शिवाजी कदम व परदेशी यांनी ऑनलाईन एफआयआर तयार करून घाईगडबडीत सह्या घेतल्या व घरी पाठवले.
“दरोडेखोर ७, मग एफआयआरमध्ये कमी का दाखवले?”
घरी आल्यानंतर गोरे कुटुंबाने कायदेशीर सल्ल्यासाठी एफआयआरची प्रत वकिलांना पाठवली. त्यावेळी “तुमचा गुन्हा योग्य कलमांनुसार व योग्य तपशिलासह नोंदवलेला नाही,” अशी धक्कादायक माहिती समोर आली. दरोडा पीडित गोरे कुटुंबीयांनी आरोप केला आहे की, घटनेच्या वेळी प्रत्यक्ष ७ सशस्त्र दरोडेखोर घरात घुसले होते. मात्र, पोलिसांनी घाईगडबडीने नोंदवलेल्या एफआयआर (FIR) मध्ये दरोडेखोरांची संख्या कमी दाखवून आणि चोरीस गेलेल्या ऐवजाची नोंद चुकीच्या पद्धतीने करून कुटुंबाची फसवणूक केली आहे. पोलीस प्रशासनाकडून योग्य कलमे लावून सहकार्य केले जात नसल्याचा आरोप कुटुंबाने केला. एकीकडे अमानुष दरोड्याचा धक्का आणि दुसरीकडे पोलीस प्रशासनाची ही भूमिका यामुळे संतप्त झालेल्या गोरे कुटुंबाने ग्रामस्थांसह आंदोलनाचा पवित्रा घेतला.
४ महिन्यांच्या चिमुकल्याला कडेवर घेऊन महिला महामार्गावर!
शनिवारी सकाळी ९ वाजेच्या सुमारास नान्नज येथील गोरे यांच्या घरासमोर जामखेड-करमाळा मुख्य रस्त्यावर रस्ता रोको आंदोलनाला सुरुवात झाली. ज्या ४ महिन्यांच्या निष्पाप नातवाला दरोडेखोरांनी ‘पायाखाली तुडवून मारू’ अशी धमकी दिली होती, त्याच बाळाला कडेवर घेऊन मनिषा गोरे, सून आणि गावातील शेकडो महिला रस्त्यावर बसल्या.
ग्रामस्थांनी महामार्ग अडवून धरल्याने दोन्ही बाजूंना वाहनांच्या लांबच लांब रांगा लागल्या होत्या. “जोपर्यंत चुकीचा गुन्हा दुरुस्त होत नाही आणि योग्य न्याय मिळत नाही, तोपर्यंत रस्ता सोडणार नाही,” असा आक्रमक पवित्रा आंदोलकांनी घेतला.
उपविभागीय पोलीस अधिकाऱ्यांचे (DYSP) लेखी पत्र आणि माघार
आंदोलनाची तीव्रता आणि गांभीर्य लक्षात घेऊन पोलीस प्रशासनाची मोठी पळापळ झाली. कर्जत विभागाचे उपविभागीय पोलीस अधिकारी सुजितकुमार क्षीरसागर यांनी तातडीने हस्तक्षेप करत आंदोलकांशी संपर्क साधला आणि प्रशासनातर्फे अधिकृत लेखी पत्र जारी केले.
पोलीस प्रशासनाच्या लेखी पत्रातील शब्द: “आपण दि. ०३.१०.२०२६ रोजी जामखेड-करमाळा रोडवर नान्नज गावात रस्ता रोको आंदोलन केले असून, सदर आंदोलनातील आपण केलेल्या मागण्या प्रशासनास मान्य आहेत. त्याप्रमाणे सखोल चौकशी करून पुढील योग्य ती कारवाई करत आहोत. तरी कायदा व सुव्यवस्थेचा प्रश्न विचारात घेऊन आंदोलन तात्काळ मागे घ्यावे.”
जामखेड पोलीस ठाण्याचे सहाय्यक पोलीस निरीक्षक (API) अजित मोरे यांनी स्वतः आंदोलनस्थळी जाऊन हे लेखी पत्र गोरे कुटुंबाला सुपूर्द केले. पोलिसांकडून लेखी आश्वासन मिळाल्यानंतर तब्बल ३ तासांनी रस्ता रोको शांततेत मागे घेण्यात आला.
या घटनेमुळे नान्नज व परिसरात भीतीचे आणि संतापाचे वातावरण कायम आहे. पोलिसांनी या प्रकरणातील दरोडेखोरांचा तातडीने शोध घ्यावाच, शिवाय पीडित कुटुंबाला योग्य न्यायाची कलमे लावून सहकार्य करावे, अन्यथा पुन्हा तीव्र आंदोलन छेडू, असा इशारा नान्नजच्या ग्रामस्थांनी दिला आहे.
