शेतकऱ्यांसाठी आनंदाची बातमी! नमो शेतकरी योजनेचा ८वा हप्ता खात्यात जमा; तुमचा हप्ता आला का? असे चेक करा

जामखेड: राज्यातील शेतकऱ्यांसाठी आर्थिक दिलासा देणाऱ्या ‘नमो शेतकरी महासन्मान निधी’ योजनेचा ८वा हप्ता मोठ्या प्रमाणावर वितरित करण्यात आला. मुख्यमंत्री Devendra Fadnavis यांच्या हस्ते मुंबईतील विधान भवन येथे झालेल्या कार्यक्रमात थेट लाभ हस्तांतरण प्रणालीद्वारे तब्बल ८९,७५,२९८ शेतकरी कुटुंबांच्या खात्यावर एकूण १७९८.७८ कोटी रुपये जमा करण्यात आले.

या कार्यक्रमाला उपमुख्यमंत्री Eknath Shinde, उपमुख्यमंत्री Sunetra Ajit Pawar, कृषी मंत्री Dattatray Bharane, उद्योग व मराठी भाषा मंत्री Uday Samant, शालेय शिक्षण मंत्री Dadaji Bhuse, राज्यमंत्री Ashish Jaiswal यांच्यासह कृषी विभागाचे वरिष्ठ अधिकारी उपस्थित होते.

या महत्त्वाकांक्षी योजनेअंतर्गत २४ मार्च २०२६ अखेर पहिल्या ते सात हप्त्यांमध्ये एकूण १३,०१७.३० कोटी रुपये ९३.०८ लाख शेतकरी कुटुंबांच्या खात्यावर जमा करण्यात आले आहेत. आठव्या हप्त्यामुळे राज्यातील शेतकऱ्यांना सातत्याने आर्थिक पाठबळ मिळत असल्याचे स्पष्ट झाले आहे.

थेट लाभ हस्तांतरण प्रणालीमुळे निधी थेट शेतकऱ्यांच्या बँक खात्यात जमा होत असल्याने मध्यस्थांचा हस्तक्षेप टाळला जात असून पारदर्शकता वाढली आहे. त्यामुळे शेतकऱ्यांना कोणत्याही अडथळ्याविना त्वरित लाभ मिळत आहे.

तुमचा हप्ता जमा झाला का? असे तपासा

नमो शेतकरी महासन्मान निधी योजनेचा हप्ता तुमच्या खात्यात जमा झाला आहे की नाही, हे शेतकऱ्यांना अगदी सोप्या पद्धतीने तपासता येते. खाली दिलेल्या टप्प्यांनुसार ही प्रक्रिया पूर्ण करता येईल:

ऑनलाइन पद्धत (संकेतस्थळाद्वारे तपासणी)

१) सर्वप्रथम आपल्या मोबाईल किंवा संगणकावरील इंटरनेट ब्राउझर उघडा आणि अधिकृत संकेतस्थळ nsmny.mahait.org येथे भेट द्या.

२)मुख्य पानावर (मुख्य पृष्ठावर) ‘लाभार्थी स्थिती’ (Beneficiary Status) हा पर्याय दिसेल, त्यावर क्लिक करा.

३)पुढील पानावर तुम्हाला तुमचा नोंदणीकृत मोबाईल क्रमांक किंवा आधार क्रमांक टाकण्याचा पर्याय दिला जाईल. योग्य माहिती भरा

४) त्यानंतर स्क्रीनवर दिसणारा कॅप्चा कोड अचूकपणे भरावा.

५) काही वेळा तुमच्या नोंदणीकृत मोबाईलवर एकवेळ संकेतांक (ओटीपी) येतो. तो दिलेल्या चौकटीत टाका.

६) सर्व माहिती भरल्यानंतर ‘सबमिट’ (सादर करा) किंवा ‘माहिती मिळवा’ या बटणावर क्लिक करा.

७) त्यानंतर तुमच्या समोर तुमच्या खात्याची स्थिती उघडेल. त्यामध्ये हप्ता जमा झाला आहे की नाही, किती रक्कम जमा झाली आहे, याची सविस्तर माहिती दिसेल.